أغالب الشوق

Admin الثلاثاء سبتمبر 18, 2007 3:27 am

أغالب الشوق

يا المالى حياتى

غنا والحان ...

طَمَّنى …

بَدَّل خوفى سرور وأمان..

عليهو بغنى ،

الهذَّب فنى ...

عليهو

عزفت مقاطع دَنَِّى...

أطمِّن قلبى

معاه واْمّنِّى

أبيع الكون يوم يسأل عنى ...!!!!

سمير وجدانى

الهَزَّ كيانى ...

وفوق للريد

زَوَّدْنى أمانى ..!!

أغالب الشوق

لى شوفته وأعانى ...

متين .. يا توم الروح تلقانى ...؟؟؟

الساكن قلبي

وكل منايا ..

الزيّن حسنه

معانى غنايا ...

أمَنِّى الروح

بى قربه معايا ...

الشوفته .. مراد الروح والغاية .. !!!

بَدَّل خوفي سرور وأمان...

الريد بالريد بتربى

مهدود البال والحيل

مسنود على باب الذكرى

وعشمان فى طول الليل

الغطى جبال الفكرة

تاريخ الريد الحافل

بى فرقه وقسوة ونكبة

خلينا نعيدها صياغته

ويتهنوا الكانوا أحبة

ياخايف سطوة ريدك

الخوف مادس محبة

بادر بالشوق العندك

الريد بالريد بتربى

قالوا الايام بتغير

فيك ما بتتبدل شعرة

رغم السنوات المرت

نفس الاشراق والنفرة

استبشر قلبى و أمل

فى فرحة بتشرق بكرة

وقال انت الدنيا الحلوة

الجاى وماضى الذكرى

عجلات الزمن الدايرة

ما وقفت لى مشجون

عمره التاريخ ما اتوقف

يستنى علاج محزون

يلاكى نساير الفرحة

ونتهنى كفانا ظنون

العمر الباقى قصير

ممكن نملاه فنون !!؟

متغابى العرفة

متغابى العرفة وما سائل

فى زول عن شخصك متسائل

يا ناسى الناس حلمك بينا

نسيان الريد ليهو وسائل

عارفنك معجب بي روحك

متهنى وسارح فى دوحك

بتقلّى بشوقك مجروحك

وانت ولا هامى ولا سائل

شيشك يا القاسى و متناسى

مع ناس متساهل وبتواسى

وبى ناس لا راضى ولا حاسى

بتقربوا منك متجاهل

أيامك زيك دوارة

ما بتضمن أبداً مشوارها

مرات تتكشف أسرارها

ومرات لا تدى ولا تجامل

بتصفى حسابك ويانا

ولا الأيام هى القاصدانا

يا الكنت منابر دنيانا

نسيان الناس كده بالساهل ؟؟؟

فوت الفاتك

فوت الفاتك

واحيا حياتك

يا الداريت الناس في عيونك

إيه الفاضل ليك غير ذاتك !!؟

لا بتنهد صروح الدنيا

لا بتنسد دروب المنيا

للمستنى ربيع أيامه

لا الموعودة بفوتها خريفها

والأيام ما بتدى حريفها

وبحر الريد بيشيل عوامه

عاتى الريح كم تطغى وتفتر

غضب الموج فى الشط بتكسر

كم محزون قاوم … آلامه

شهراً ما بينوبك ماله

ما تتعلق بى آماله

ما ترجاه تعد … ايامه

فوت الفاتك

وأحيا حياتك

عمره الفات ما ذكر أيامه

وانسى الريدة بريدة جديدة

وعيش الدنيا بنظرة بعيدة

وقلبك ما يعميهو غرامه ..!

فوت الفاتك ..

يامكابرة

ما تغالبى الريد بغلبك

وبظهر الخافيهو قلبك

حتى عينيك ما حتقدر

رغم حرصك تخفى حبك

يامكابرة

إيه بضيرك لو صدقتى

وقلتى كل الحاسة بيهو

قلبك الشايل هوانا

خليه ينعم باللى فيهو

عقلك الما نسانا لحظة

يهنا بى لقيانا ليهو

و ايه بفيد حبس المشاعر

لما تلقي المشتهيهو

يامكابرة

قولي كل الحاسى قلبك

وكل خاطرة تهز شجونك

ما تخبى الفاض ودفق

ظاهر الشوق فى عيونك

فى ابتسامك ريدنا واضح

فى كلامك فى سكونك

مهما كابرتى وصبرتى

ياما عزمك يوم بخونك

يامكابرة

الزمن لو مرة أنصف

ولمّ شملك بى هواكى

أسرقى اللحظة الجميلة

وغنّى للعايش معاكى

السعادة قصير زمانها

فرحى الجواكى باكي

الزمن لو أدى ضهره

ما بفيد تانى التباكى .. يامكابرة ..

الزول المحير صمتو

الزول المحير صمته

باين فى سكوتو عظمته

أحكو عن العجب فى عيونه

لو من هول عيونه سلمتو

شوقى على العليهو كتمته

قلبى الرادك إنت ظلمته

علمتو الأمل … ألمته

حكّمتو ورجعت حكّمتو

أهداك الجمال أوسمته

والشقا لى قليبىقسمته

اتوسل رفع مظلمته

لى ظالمو ورئيس محكمته

الهام بى هواك الهمته

القول فى العيون ما فهمته

منك خوفو ياالأزمته

دا اللاذ بيك و انت هزمتو

يا القدامنا ما اتكلمته

كم فى الريد سرحتو وهمته

لا الدرب البودى رسمته

لا قلتو النصيحة ولمتو