افتقدتك

Admin الثلاثاء سبتمبر 18, 2007 3:26 am

افتقدتك

السما ..

الشايلات غيومه

جانى يسأل قلبى عنك..

والصباح ..

قسّم همومه

وجاى كايس الفرحة منك..

وانتى همى ..

الما سليته

وعمرى ما مليته ضنّك..

وافتقدتك !!!

افتقدتك

فى زمن

لحظاته تتلون بلونك..

والعيون ..

الحولى كانت

تسرق الشوق من عيونك...

والحنين

واصلنى بيكى

وما بطيق الدنيا دونك ....

وافتقدتك!!!

المتاجر ..

سحر لونك

والمتاحف ليكى تشهد ...

والشوارع ..

خاوية دونك

وعمرى عمران بيك مورد...

وفى عيون الناس

عيونك ..

مرة تبسم ومرة تجحد...

وافتقدتك!!!!

افتقدتك

وقلبى غيرك ماهو شايف

غنّى ريدك وليهو ردّد ...

رجعّت ..

شوقه المشارف

وياما كان في قربك أسعد...

وانتى ..

فينى وما لقيتك

وديمة بى ريدك مسهّد....

وافتقدتك!!!!

فى دواخلى

تفور همومى

وفينى تتبارى المدارس...

الوطن ..

والغربة ..

والليل والمجالس ...

وانتى

فوق كومهم قعدتى

حبى ليك ياأحلى هاجس !!

وافتقدتك ..!!

إفتقدتك..!!!

افتقدتك!!!!