بلقوكى فى عينى

Admin الثلاثاء سبتمبر 18, 2007 3:14 am

بلقوكى فى عينى

ولمَّا الناس

تعاين ليْ

أخاف .. يلقوكى فى عينيْ..

ولما

اتْحاشَى نظْراتهم

ألاقيك فيها ..تضحكى ليْ..

ولما

تغيبى من العين

أشوفك ..فى بصيص الضيْ..

قناعتى البيكى

قايدانى

وفرحى البيكى .. مالى عينيْ..

وخوفى عليكى

من نفسى

وروحى الخـايفة.. تِتْوَجَّسْ..

وتَطْلَعى

من مسـارب الروح

نـسيم .. يِنْعِشْنى واتنفس..

ولو بالصدفة

سيرتك جات

أقول: ديل حَسُّوا..عرفونى..

ولاّ يكونوا

عِرْفُوا الريد

وفى عينـيكى شـافونى..!!

واتفادى

الكلام عَنِّكْ

واسوق القُـول .. بعيد مِنِّكْ..

واْدارى الريدة

لكِنِّكْ

برغم انكـارى.. حَـاسِّنِّكْ..!

وفى أعمـاقى .. شـايْفِنِّكْ !!