سائلين عليك

Admin الثلاثاء سبتمبر 18, 2007 2:54 am

سائلين عليك

سائلين عليك

كل العباد

الجونا منك والمشوا..

يوماتى

سيرتك أحلى زاد

لى زول غيابك أوحشه..

يتنسّم الأخبار عليك

ما السيرة ساكت تنعشه...!!

سائلين عليك

قمر السما

دا المن جمالك فتنته.....

اللاهى

يِِرْعَنُّوا النجوم

شال من ملامحك نضرته...

يتهادى

ما بين الغيوم

بهرج جمالك طلعته....

سائلنه

ليه طال الغياب

وين البنعشق طَلَّتُه...؟؟؟

لا رَدَّ

لا جايب خبر

أشواقنا وين ؟ .. ما وصلته..!؟

هانت

سنين الود عليه

ولاَّ المشـاغل نَسَّتُه...!؟

سائلين عليك

شوق العيون

لو لينا سمعوا وانصته...

يا شوق سَرَى

وما شاف وَرَا

لامن عيونك نـادته...

ورِّيهُو

يا شـوقنا الهوى

شـارك عيونّا الرادته..!!

قول ليهو

لو طال الغياب

ما زلنا راجين عودته...!!

طَارِينا

ولاَّ غياب سنين

غَيَّّْر مـلامحو وقصـته...

الليهو ..

فى الأفراح نصيب

بجى يوم وياخد قسمته ..!!!!

أنفاس البنفسج

زاهى وحسنك ابهج

عم الكون وبهرج

كل العاجباه روحه

حسنك ليه توج

يالفتح نضارك

فى اللون البنفسج

يالكاتل طريفك

كاحل سابل أدعج

كل الشافه غنى

وقام بى حسنك يلهج

بعدك ياما أبكى

وقربك ياما ابهج

يا أملى المفتح

زى ورد البنفسج

بينى وبين زمانك

ليل طايل مموج

و بينى و بين عيونك

ود موصول ومنهج

يا العَبقت روايحك

أنفاس البنفسج

يا الدارى ومدارى

وانا لى ريدك أحوج

يادارى ومدارى

منك مافى مخرج

عارف السوا حسنك

بدّع وفينا فرّج

يا إعجاز زمانك

زان بيك البنفسج ..

تامنة عجايب الدنيا

صباحات الله بى خيرها

وصباحك أحلى ما فى الكون

يا الوهج البقيد صباحى

فى أعماقى نار وشجون

يا تامنة عجايب الدنيا

يا اللا كان ولا حيكون

يا الحسن البغازل روحه

يا محور مدار الكون

ترتاح روحى و أتنفس

على هدب الطريف مفتون

واشتاق للشقا واتشهى

وعداً قاطعا أحلى عيون

ما همانا وانتى معانا

والكائن مصيره يكون

راجى هواكى واترجى

و أساهر ليلى كله ظنون

البجى من عيونك زين

سعادة دنيا ولا شجون

حتى إذا أذتنى رموشها

رضيان بالأذى وممنون

لا بطلاً بلاقى سهامها

لا صابراً بلاها بكون

يا تامنة عجايب الدنيا

ياللا كان ولا حيكون ..

زاد السفر

كان العشم تبقى المقر

لى زول حياتو شقا وسفر

غرّب شقى و غاب ما لقى

قبّل حفا وبحّر فتر

كان عشمو تبقى المستقر

يا البسمتك زاد السفر

فى ليلة سهران والقمر

لما السهر غلبو السهر

خلانى للغربة ونفر

فى ظلمة الليل الفتر

بان طيفك ..

الهاش البشوش

فى عتمة الأحزان حضر

ضاحك يقالد غربتى

منّانى بالخير والبُشر

بى لهفة المشتاق إليك

لا رهبة لا خوف لا حذر

سارعت بالأحضان

أسابق شوقى للطيف الحضر

لكنه ضاع من غير وداع

اتلاشى لا حس لا خبر

وأنا حضنى مفتوح للوهم

حتى الوهم فات ما صبر

مع انى عارف من زمن

مكتوب على أشقى الدهر

لا أهنا يوم لا القى نوم

لا يوم يصافينى القدر

الزيّى أبداً ما بتوب

طول عمره يحلم بالقمر

كان عشمه تبقى المستقر

يا البسمتك زاد السفر