شعرة معاوية

Admin الثلاثاء سبتمبر 18, 2007 2:53 am

شعرة معاوية

السبيبة

الواصلة منِّك

قَوَّّت الآمال فى حِنِّكْ ..

ما بَِشِدَّها

مهما جُرْتى

وبََبْقَى فوق لى حُسْن ظَنِّكْ ..

وبَرْخِى

لو شَدِّيتى انتى

الظنون ما بِشْبَهَنِّّكْ ,,

وببقى عشرة

عليها و اكتر

لو مشاعرى بِيَوْصَلَنِّكْ..

لسه

يا كنز العطايا

الكتير راجنو مِنِّكْ ..

يِنْحَسِرْ

مَدّ الغشاوة

وينطَرِح خاطر البِجَنِّّكْ ..

وتبقى

كل البينا صافية

والهواجس فَارَقَنِّكْ ..

والغريبة

برغم ظَنِّك

كل حواسى بِصَدِّقَنِّكْ ..

فوق غمام الريد

بَنِيتْلِكْ

من هواى مسرح لِفَنِّكْ ..

وحلمى

كِبْرَتْ بيك مَدَارْكُه

وعمرى أصبح يحكى عنك ..

والجميل

فى الدنيا انك

كل دواخلى بِيَنْدَهَنِّكْ

و انتى ..

يا منية زمانى

روحى صِبْحَتْ حاجة منك ..