يامكابرة

Admin الثلاثاء سبتمبر 18, 2007 2:32 am

يامكابرة

ما تغالبى الريد

بِغَلْبِكْ

وبِظْهَرْ الخافيهو قلبك ...!!

حتى عينيك

ما حتقدر

رغم حرصك تخفى حبك ...!!

يامكابرة

إيه بِضِيرِكْ

لو صدقتى ...

وقلتى كل الحاسة بيهو ...!!

قلبك

الشايل هوانا

خَلِّي يِنْعَمْ باللِّى فيهو ...!!

عقلك

الما نْسَانا لحظة

يَهْنَا بى لقيانا ليهو .....!!

و ايه بفيد

حَبْس المشاعر

لما تلقي المشتهيهو ...!!!

يامكابرة

قولي

كل الحاسِّى قلبك

وكل خاطرة تْهِزْ شجونك...!!

ما تَخَبِّى

الفاض ودَفَّقْ

ظاهر الشوق فى عيونك ...!!

فى ابتسامك

ريدنا واضح

فى كلامك فى سكونك ...!!!

مهما

كابرتى وصبرتى

ياما عزمك يوم بخونك ...!!!

يامكابرة

الزمن

لو مرة أنصف

ولَمَّ شملك بى هواكى ....

أسرقى

اللحظة الجميلة

وغَنِّى للعايش معاكى .....

السعادة

قصير زمانها

فَرِّحِى الجُوَّاكِى بَاكِى ....

الزمن

لو أَدَّى ضَهْرُه

ما بفيد تانى التباكى .. !!!!

يامكابرة ..