توب الشتا

Admin الثلاثاء سبتمبر 18, 2007 2:07 am

توب الشتا

تعالى

بتلقى عندي أمان

يهدهِد كل أحزانك ..

تعالى

ولسة فينى مكان

زمن مستنى إيذانك ..

معاك

ببقى القليب عمران

تسهرج ليله نيرانك ..

يقيم ليلك

تواشيح ريد

يغلِّب شوقه حِيرانك ..

تعالى

معاكى كل الكان

قليل الحسُّوا الوانك ..

متاهة

دربك الحفيان

كتير ضهَّبتى عشمانك ..

تعالى

مبارية درب الشوق

بِصَلْ لابدَّ حَيْرانك ..

دواخلك

مرقد الاحلام

تنادى الكانوا سكّانك ..

رحابك

للهموم لولاى

منو الأداها عنوانك؟

صباحك

بالعسل مشنون

على وش الشروق زانك ..

تشعِّى

ويكسى عمرى النور

واغنِّى الراوى حسَّانِك ..

وأدوبى

مع العمر طربان ..

قوافى الفرحة ...نشوانك ..

ويقيف

شبح الوجع

مصلوب

تنادى كنايسه رهبانك ..

وتهزِّى النخلة

تجدع ليك

أمان ما بخذل إيمانك ..

تعالى

بتلقى ذاتك فيْ

وأخاطب فيك إنسانك ..

بتلقى

شليلك المفقود

شليل ماراح

شليلك حيَّر التمساح

شليل مستنى أزمانك ..

عمر ممدود ..

بغير حدود ..

سنينو شهود

تمارسى عليهو سلطانك ..

أبِشْرى ..

وودِّعى الاحزان

أنا فارس الهموم هجّام

ملاذ الحوبة هجّانك ..

تميمة

على رقبة الشوق

متى ما دُرْتى ..، حصَّانك ..

بغطغط فيك

بتوب الريد

بكون فى الفزعة رحمانك ..

أنا

توب الشتا المدسوس

صقيع الصحرا دفيانك ..

وأنا

درَت الخريف عطّاى

إذا نادتنى وديانك ..

وانا

ورد الربيع نديان

إذا لامسْت وجدانك ..

ولا

وجع الزمن الزام

ولا خوف المصير صانك ..

تعالى

معاك جحافل الشوق

بتلقى مشاعري فرسانك ..

سيوف ريدهم

على المابيك

طوابيهم على الخانك ..

غليلك

رشفة من نيلك

خليلك وغنى أوزانك ..!!!