زفة الأشواق

Admin الثلاثاء سبتمبر 18, 2007 2:03 am

زفة الأشواق

الدَّرِب كَتَّال

جابني درب الشوق..

يا قليب رحال

ياخي أرسى وروق

في زمن بطال

الفرح مسروق

غنى ليك الفال

وفج ليك شروق

الحشا الملال

قاد لهيب الشوق

شوقه للترحال

زي حنين النوق

كان

بكا الأطلال

بنفع المفروق

ليك

عمري حلال

والبقية فروق

يا حبيب يا ذوق

يلا سوقني واسوق

زفة الأشواق

لي مراسيك فوق

في مواني الريد

نبني عش الشوق

نفرش الآمال

نستريح ونروق

في كتاب الريد

ريدنا ما مسبوق

عطَّر الإحساس

ندُّه فاح معبوق

طيَّب الأنفاس

صندله المحروق

يضحك العشمان

بالفرح مشروق

السما الهطَّال

شعَّ وجهه بروق

جرعة للعطشان

فكَّة للمريوق

الأماني قراب

والقريب ملحوق

غَنِّي يا إنسان

بختك أرسى وروق !!!!