عويناتك

Admin الثلاثاء سبتمبر 18, 2007 2:02 am

عويناتك

( إلى التي تحدتني عيناها فاخرجتني من صمت تعمدته)

عويناتك ..

سما السودان

شموخ "توتيل"

عراقة النيل

مسادير الطرب والشان..

هامات النخيل والدوم

"خور القاش" و"وادي ازوم"

رقيص الرقبة والمردوم

وكل جميلة في السودان ..

نغم موال

وشيل شبال

وفرحة فال

حماس زغرودة للعرسان ..

حماس اعراب

وشيل نشاب

سمر اصحاب

نصايص الليل علي القيزان..

مراسي امان

وليل عاشق

ملآن اشجان

واعجـاز آية في القـرآن..

عويناتك

وطن اجداد

ماضي ملوك .. ولوح امجاد..

سيف بتار

ودمَّاً يغلي في الثوار

وقلباً حـار هميم وقَّـاد..

مراد عشاق

وشحنة شوق

شديد دفاق

سمـاح قلبا هَدِي وريَّـاد..

دعاء صلوات

بخور نُسّاك

وكفّارات

هجوح ايمان .. خشوع عُبَّاد..

عويناتك

وطن امجاد

وماضي ملوك وعز اجـداد..

عشان

وطن الجدود فيهن

حباب الموت ورا الامجـاد ..

عويناتك

بحر جرّاف

تناديني

البِّي نداك انا الهايم

اسـارع جاري للمـقداف ..

انا التايه ..

انا الجوال

مُرَبَّي قليبي للترحال

يصارع كل يوم جـرَّاف..

محال يعشق

بلا الاسفار

ولا في مرة يخشي ودار

ولا في عمره يوم ما خاف..

علي البلد

اللي ما محدود

علي العمق

اللي ما موجود

شـرابه هيام وزاده كفـاف ..

عويناتك

امل الاف

طرب مُدَّاح وعطراً فاح

مُلبَّد شالو فال الخير

مُعَبَّـق بالكُلِيد والشـاف ..

زغاريد زين

مقنَّنة بي دعا الطيبين

سحابة خير

تطـوف البادية والاريـاف..

عويناتك ..

مداين نور

علي بلدا نهارو ظـلام ..

هلاك بلدا

شبع حارسو

شَخَر في النوم شبع ما قام ..

وسيف

في صفحة التاريخ

ملطخ بي دم الابطال

كتب أُنشـودة للايـام ..

بتحكي

عن اللي عزُّوا النيل

عن البي عزَّة هامـوا هيام..

عويناتك

فرح عابر

علي ناسا عـذابهم دام ..

دعا أُمَّاً ..

مع الصلوات

"يزيل الغُمَّة من الفات

واتغرب

عشان يكفي الاهل آلام" ..

عويناتك

حجا جِدّات

وحِن اُمّات

يلولَنْ في الغشاهو نعـاس ..

نفور ودلال ..

عشم كتَّال

بتطعن في الحشا المفجوع

وتطحن في قلوب النـاس ..

عويناتك تدودِرْنا

وتدوِّرنا وتودِّرنا

وبتشعل في قلـوبنا حماس ..

تولِّد فينا

حب اثنين:

"ابداع ربي في العينين"

"سواداً سوَّا فينا مساس"..

بشوف فيهن

جذور اهلي

وشمساً في الشتا القاصع

تدفِّي من الصقيع الناس ..

عويناتك ..

وما قادر

أوصِّف كيف عويناتك

واقول القبلي ما إتقال ..

تشد مرة ..

وتصد مرة

تقابل مرة بالنفرة

وتصابح مرة بالإقبال ..

ومرة علينا ترشح وُد

ومرة يشيلنا فيها المد

وما قادرين نصل لا حد ولا آجال ..

عويناتك

أمل قلبي

الرقد واتمدّ في عينيك

واتوسـد فراش الفـال ..

ترك فرحو

هجر مرحو

عشق ألمـه البدا وما زال ..

فرح

جِدي الكبير في العيد

حزم وسطو

درع جِبَّة

وجدع فوق كتفو عِمّة وشال ..

عويناتك

غناوي سرور

وحِنْ سلكاية في طنبور

حنين قربة .. وطرب الحان ..

اساس اصلي

ومكان اهلي

ومرافيء الروح .. ومرسي امان ..

عويناتك

تناديني

اسـارع اجيـك انا الـرُبّان ..

اقدِّف

اسوق "سفينة نوح"

اصـارع ثـورة الطوفـان ..

عشان

من الضياع احفظ

نسِل آدم

بذور الـدنيا والانسـان ..

عويناتك

سفر ازمان

وعزاً كان وحـتي الآن ..

عناق عشاق

وشحنة شوق

شديد دفاق

مناجاة ريد .. عشق ولهان ..

بيني وبينها

كان الكان

ولسة لقانا ذو اشجان ..