مرسى العمر

Admin الثلاثاء سبتمبر 18, 2007 2:01 am

مرسى العمر

لو ماانتى ..

منو الحيكون !؟

ولو ما الليلة .. متين حنكون ..؟؟؟

بكرة وبعده

وباقى عمرنا ..

يلا نغيِّر مغزى الكون .. !!!

يا الزيَّنْتى

الدنيا سماحة

ويا الأديتى الحب مضمون..

ويا الاهديتى

حياتى ملامح

منك شايلة وجاهة ولون..

وبيكى اتلوَّن

عمر الفرحة

يا الغناكى شبابى شجون ..

فتَّحْ

زمن الريد احضانه

للجايين .. والفاتو .. سكون ..

وين داسيكى

الزمن الاغبر

يا ممزوجة حلا وزيتون ..

مرسى العمر

الكان راجيكى

رامى سقايله على المضمون ..

ياها ملامحك

وين ما طلَّت

تشرق شمس الدنيا فنون ..

وياها عيونك

وين ما لاقت

تهدى مسار أيامنا شجون ..

داير اتعلم

منك واعرف

كيف نتحدى قساوة الكون ..

وأعلمي انه

القوة المنِّك

زاد العشقك وبيك مفتون ..

كونى البهجة

وكونى النسمة

وكونى الضحكة مُنى المحزون ..

ويلاَّ اتفتَّقى

فُوحى سماحة

وفى دنياى انشرِّى عيون ..

واهدى الريدة

وسامة وقوة

تهزم اسانا الكان مدفون ..

والأيام

نعدل خطواتها

والأحزان نرويها مجون ..

سوى نتحدى

الزمن الظالم

نفحة حُبِّك درقة وصون ..

يا العامريَّة

الغالب ريدك

أنا بي ريدك جدْ مجنون !!..