ياشقانا المشتهنو

Admin الثلاثاء سبتمبر 18, 2007 1:56 am

ياشقانا المشتهنو

قولي قولي وفرحينا ..

وزِّعي الافراح علينا ..

ما الفرح ..

من زارنا طَوَّل

وتار قـديم ياالسمحة بينا ..

والعمر

محسوب وحاتك

وكل سـاعة تمر عـلينا..

والسنين

تتجاري فايتة

حاتَّة هَمْ الـدنيا فـينا ..

والليالي

مسافرة .. رايحة

فايتة .. ما بترجع تجينا ..

كلّ عام

النيل يعربد

فوق جروفو يزيدها طينة ..

ونحن فوقنا

الهم يعربد

ويرمي غلب الدنيا لينا ..

نحن

ما للهَمْ جروفو

يانا .. مما قمنا جينا ..

القليب

تزداد رهافتو

ونبقي للحرمان سفينة ..

دا الحِنيِّن وطبعو وافي

لا بيعادي ولا بيجافي

اصلـو من انبل عجينة ..

يوم ولادته

الريد بدوهو

ومن حليب الريد

سقوهو

وعمره ما عرف الضغينة..

اصلو حب الناس شعاره

والعشق دربه ومساره

حـالو مما قمنا جينا ..

زي كأنه

عارف انه

يـوم بقابلك ياحـنينة ..

قولي ليهو .. وفرحيهو

غني ليو وداعبيهو

وهـِزِّي اوتارو الحـزينة ..

دا الهواكي واشتهاكي

وصال وصفّق يوم لقاكي

وصفّقـت خلفو المـدينة ..

في عيونك شاف هناهو

في صفاها النيل لقاهو

وفي مياهو لـقي السكينة ..

والفرح ما بيكي تمَّ

فرحة أُم زفَّت وحيدها

راجية تحسب طول سنينها ..

الزغاريد والغناوي

الدلاليك التخبِّط

صـوتها شاقي الليل يجينا ..

الشبابيل والحريرة

ريحة الشاف والضريرة

زفة الليـل والسفينة ..

العريس بي سيفه بشَّر

والوزير الجال وشمَّر

وهزَّ في السـمحة الرزينة ..

الصحاب من حولو غنُّوا

وختُّوا فال الحنة قالوا:

"تبـقي برضوا العُقْـبة لينا" ..

في عيونك ياما طفنا

وفيها شفنا

بهـرج اللـيل في المـدينة ..

دنيا قايمة

ودنيا قاعدة

ودنيا تـالتة تنـادي فينا ..

والصدير ياالسمحة طامح

والنهيد في ساحو جامح

زينـة يمة .. ويمة زينـة ..

الشموخ الفيهو وارثو

مالي صدرك وباقي فارسو

سـلَّ سـيفو ونادي لـينا ..

نحن شن قدَّرْنا بيهو

ما كفانا نغني ليهو

ياهو دا المكـتوب علـينا ..

..

النخيل اهداكي هامتو

دسَّ "يوسف" فيك وسامتو

شـان تكـوني وتبتلـينا ..

سمرة اللون من "بعانخي"

فيكي دم "ترهاقا" يسري

ويجـري زي ما جاري فينا ..

ياجدايل من ضفيرة

يابطولة أُمّة

غنّت ليك "مهيرة"

يحفظ التاريخ فصولها

ويحـكي لـينا ..

يامقاطع من قصيدة

ياعيون مليانة ريدة

واسمي روح مشتولة فينا ..

في خديدك بان املنا

شفنا فيك "فينوس" زمَنَّا

فـرحة ايامـنا وسـنينا ..

يادهب أُماتنا

يالداخرنو

للـزين يـوم يجـينا ..

ياسمحنا .. ويافرحنا

ويابلاسم فوق جرحنا

وياشقانا المشتهِنُّو

وياهــوانا المشتهـينا ..

طيري حلِّقي في سمانا

لهلبي النار في حشانا

سـوِّي زي ما عايزة فينا ..

بس وحاتك قولي لينا

وفرحينا ..

كان رضينا وكـان ابينا

غيِّرى المكتوب علينا

وامـسحي الدمعة الحزينة

يارزيـنة

وياحـنينة

وياأمـينة