بالتفاصيل المملة

شيخ العرب الإثنين أكتوبر 29, 2007 4:58 pm

نشرت: 22/10/2007 - 19:51 عدد رقم 5783
•
نقلا عن جريدة قوون الرياضية
* الزول الممل ده زي الدعايات في الحلقة الاخيرة من المسلسل العربي·
* بمناسبة المسلسل العربي ليه زمان الكهرباء بتقطع في الحلقة الاخيرة·
* الناس تلقاها تزحزح من نادي الي نادي مثل (قدحة التوم) في لحظة بتنتشر في (الحلة( كلها من الحلة بتاعة الملاح الي (الحلة) بتاعة الفريق·
* وزمان برضو كان في ناس كراعها حارة محل ماتمشي تقطع الكهرباء،·
* قالوا ليك واحد بتاع تاكسي وقفو ليك زول في الشارع!
* اسمع فاضي يا استاذ!
* يعني لو مافي واقف ليك ليه!! تفتكر عندي (استك) ضرب!!
* ياود الناس مافي داعي للمساخة·· انت سواق تاكسي والا مبعوث الامم المتحدة·
* انت ماشي وين؟ نهايتو كدا!!
* ماشي مشوار!
* عارفك ماشي مشوار يعني ح تكون ماشي عمرة!
* صاحبنا ركب في التاكسي ولكن كان من حين الي اخر تصدر منه اعتراضات
* سريع يا ابوالشباب·
* الشارع دا مقفول00 امشي بينا بالشارع التاني·
* زيد السرعة شوية·
* اتجاوز الاشارة الحمراء·· انا مستعجل شديد·
* انت ماشي وين؟
* انا ماشي لاحق لي زول مضروب!!
* امس خليتو في دمو ما عارف الليلة الحصل عليه شنو!!
* الله يستر
* ربنا يشوفو
* صاحب التاكسي شاف وضع الراكب وجهجتهو·· زاد السرعة·
* اصبر يا ود الناس مابتجيه عوجه
* انت كان شفت حالتو تصعب علي الكافر·
*تصور عندو سبعة اطفال في المدارس·
* الزول دا هو قريبك
* ابدا مافي اي علاقة·
* انت الظاهر انسانيتك عالية وقلبك كعب·
* انا امس النوم طار من عيني·· حالتو متاخرة·
* هو زولك دا عندو شنو؟
* والله لي هسع ماعرفنا ليه شئ·· طالع من دكتور الي دكتور مثل طقم العشا·
* الدكاترة ديل ذاتهم حيرونا·
* نجيب لهم صورة الاشعة يقولوا جيبوا لينا رسم القلب·
* يدخلوا للزول شك في نفسو·
* نجيب رسم القلب يقولوا اعملوا منظار
* عملنا (منظار) قالوا جيبوا شهادة بحث·
* جبنا شهادة البحث·· طالبوا بحجة البيت
* عليك الله سريع يا ابوالشباب الوقت ضايقنا الزول دا ممكن يتوفي في اي لحظة·
* حاضر يا استاذ انت عارف انا ماشي ليك باقصي سرعة · التاكسي دا انت لو شفتو من برة بتلقاه مثل الشريط بتاع الاعلانات البمر في المسلسل·
* لكن انت ماقلت لي زولك دا وين؟
* وين كيف يعني؟
* في ياتو مستشفي؟
* الزول دا مافي المستشفي·
* ماتقول لي في المقابر
* ولا في المقابر·
* وين طيب؟
* الزول دا في المسلسل·· والليلة الحلقة الاخيرة كمان·
* مسلسل في عينك·
* ملحوظة: انزل يا ابوالشباب!!
ü هوامش
* في الهلال الايامات دي مسلسلات بائخة بشكل·
* وفد الزمالك يصل لمفاوضة الهلال في قودوين·
* محمود سعد مبعوث الزمالك·
* الجماعة ديل بفتكروا >قودوين< دا معروض في السوق الشعبي·
* هي فوضي
* الاهلي في انتظار ريكاردو·
* والزمالك يدخل طرف في الحصول علي ريكاردو·
* منو انتو القال ليكم ريكاردو معروض للبيع·
* الهلال دا دقوا ليه جرس ولا شنو·
* دلالة عديل!!
* الترجي يطلب فيصل العجب·
* طلبو وين في تلفون·
* مسلسلات بائخة هنا وهناك·
* صلاح ادريس يهاجم في كمال شداد وكمال شداد بحضر في القرعة·
* وصلاح ادريس يتحدث عن المعز محجوب في الوقت الذي ينتظره جمهور الهلال ليتحدث عن المدينة الرياضية·
* او اذاعة نادي الهلال·
* او حتي حوض السباحة·
* والمسلسل يستمر·
* كلام·· كلام ·· صراعات وخلافات ولاشئ يطفى ذلك غير عروض الهلال وانتصاراته التي تجب ماقبلها·
* ولكن في ظل هذه الخلافات والصراعات هل لنا ان نطمع بالبطولات الخارجية بل هل لنا ان نحلم حتي بالمحافظة علي بطولاتنا المحلية·
* لم يتبق للهلال غير كاس الممتاز وكاس السودان في هذا الموسم لينافس عليهما والبطولتين عرضة للزوال في ظل هذا الصراع والخلاف والكلام·
* اذا فلت كاس الممتاز من الهلال فان جمهور الهلال لن يرحم وسوف يكون الحساب عسيرا خاصة ان الهلال خرج من البطولة الافريقية في دور الاربعة وهو الاحق بالفوز·
* لاتحسبوا ان بطولة الممتاز سهلة هذا الاحساس يمكن ان يجعلها تضيع من الهلال·
* نحمد الله كثيرا ان لاعبي الهلال الاكثر تقديرا لجمهورهم والاحرص علي رضاء شعب الهلال·
* كفي منهم تلك الجدية والحماس ولكن هذا الحماس مهدد بالزوال في ظل تفكك مجلس نادي الهلال·· حتي لاشئ يظهرهم غير الصراع·
* ان الجمهور الهلالي عندنا معني بالمرحلة القادمة·
* الرهان يبقي علي جمهور الهلال·
* الي هيثم والمعز وريتشارد وقودوين وكلتشي ومساوي وفييرا وعمر بخيت وحمودة انتم الان تحققون ارقام قياسية محلية سوف تصبح عالمية قريبا ان وصلتوا بها الي الحد الاقصي·
* اننا نطالبكم بالمزيد من الجهد اما مجلس ادارة نادي الهلال فهو يقاتل في وادي ليس بذي زرع·
* خبر عاجل: هو فضل فيها خبر عاجل·